د افغانستان په کوربتوب د دوديزې غېږنيونې بین المللي جشنواره پای ته ورسېده
د افغانستان په کوربتوب د اوو هېوادونو( ايران، قرغيزستان، تاجکستان، ازبکستان، ترکمنستان او ترکيي) څخه د ۱۶۰ ورزشکارانو ترمنځ د دودیزې غېږنيونې بین المللي جشنواره، چې د ورزش ادارې په ۲۵۰۰ کسيز جمنازيوم له تېرو درېيو ورځو روانه پای ته ورسېده.
دغه جشنواره، چې په درې برخو، کورش، رستمې غېږنيونه او کشتينگيري کې د کورنیو او بهرنیو ورزشکارانو په ګډون په بېلابېلو وزني کټگوريو کې پيل شوې وه، په پای کې د کورش په برخه کې ازبکستان لومړی مقام، تاجکستان دويم او افغانستان درېيم مقام، په رستمي غېږنيونه کې افغانستان لومړی مقام، ازبکستان دويم او تاجکستان درېيم مقام او په کشتينګيري کې بیا تاجکستان لومړی مقام، ازبکستان دويم او افغانستان درېيم مقام وگاټه.
د دې سياليو د پای په مراسمو کې د هېواد ورزش ادارې عمومي رئیس مولوي احمدالله وثیق،په بریالیتوب سره د دغې بین اللمي جشنوارې د پای ته رسېدو مبارکي وويله او زياته يې کړه چې، دا د افغانستان لپاره غټه لاسته راوړنه ده، چې په یو وخت کې د شپږو هېوادونو مېلمانه او ورزشکاران راغلي وو او ښې سیالۍ یې ترسره کړې.
دغه راز نوموړي وويل، موږ هیله کوو، چې په راتلونکي کې له دې هم د سترو سیالیو کوربتوب وکړو.
همدارنګه د افغانستان ملي راډيو ټلويزيون عمومي رئيس قاري محمد يوسف احمدي بیا د دې نړيوالو سياليو په کوربتوب خوښې وښوده او زیاته يې کړه، چې دا يوازې سيالۍ نه بلکې د هېوادونو ترمنځ د يووالي او ورورولۍ سمبول دی.
ديادونې وړ ده، چې دغه سيالۍ درې ورځې وړاندې د ۶۰ بهرنيو او ۱۰۰ کورنيو ورزشکارانو په ګډون پيل شوې وې، چې نن د بهرنيو هېوادونو د استازو، د هېواد ورزش ادارې رهبري، د ا.ا.ا د بېلابېلو ادارو رئیسانو، ورزشکارانو او مينوالو په شتون کې پای ته ورسېدې، چې په پای کې يې د مسوولینو له لوري مقام ګټونکو ورزشکارانو ته مډالون، تصدیق پاڼې او ډالۍ ورکړل شوې.
