د افغانستان د بډمنتون پنځه لوبغاړي د ایران په کوربتوب په نړيوالو سياليو کې ګډون کوي
د افغانستان د المپيک، بدني روزنې او ورزش عمومي رياست اړوند بډمنتون ملي فدراسيون پنځه تنه لوبغاړي به د ايران په فجر نړيوال چلنج سياليو کې ګډون وکړي او سبا به ايران هيواد ته روان شي.
دغو لوبغاړو نن د هيواد د ورزش ادارې له رهبري سره وليدل او سپارښتنه يې ورته وکړه، چې په دغو سياليو کې د افغانستان ښه استازولي وکړي او په اسلامي روحيه ولوبیږي.
دغه سيالۍ چې د ايران هيواد په کوربتوب د جنوري په ۲۸ مه نېټه پيلیږي او د فبرورۍ تر ۲مې نېټې پورې دوام کوي، د ايران په سمنان ښار کې ترسره کېږي.
هېره دې نه وي چې په دغو سياليو کې به د څه باندې ۲۰ هيوادونو ۱۰۰ ورزشکاران ګډون وکړي، چې د افغانستان څخه به پکې پنځه تنه لوبغاړي ولوبیږي، چې درې ورزشکاران به له افغانستان او دوه تنه افغان مهاجر ورزشکاران به له جرمني هيواد څخه د افغانستان په استازولۍ پکې لوبې ترسره کړي.
