دایکندی؛ اتحاد برګر لوبډله د میرامور ولسوالۍ د والیبال سیالیو اتلولي وګټله
د دایکندي ولایت د بدني روزنې او ورزش آمریت اړوند د والیبال فدراسیون د استازولي له لوري د یاد ولایت په میرامور ولسوالۍ کې د ۱۱ لوبډلو ترمنځ د والیبال اختریزې سیالۍ د اتحاد برګر لوبډلې په اتلولي پای ته ورسېدې.
د یادو سیالیو پایلوبه د اتحاد برګر او امید اونه لوبډلو ترمنځ ترسره شوه، چې اتحاد برګر لوبډلې د ۱/۳ میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دغه سیالۍ ورزش ته د ځوانانو د هڅولو او د والیبال د ودې په موخه ترسره شوې چې په پای کې ګټونکو لوبډلو ته د یاد ولایت د ورزشي آمریت له لوري ډالۍ هم ورکړل شوې.
