دایکندي؛ چپراسک بازار کې د ۱۲ لوبډلو ترمنځ د والیبال سیالۍ پیل شوې
د دایکندي ولایت د بدني روزنې او ورزش آمریت اړوند د والیبال فدراسیون د استازولي له لوري او د اسکان زراعتي شرکت په مالي ملاتړ د یاد ولایت د چپراسک بازار په ورزشي لوبغالي کې له میرامور او شهرستان ولسوالیو څخه د ۱۲ لوبډلو ترمنځ د والیبال رمضان جام سیالۍ پیل شوې.
د یادو سیالیو لومړۍ لوبه د اسکان او شیرمه ځوانانو لوبډلو ترمنځ ترسره شوه، چې په پایله کې اسکان لوبډلې د ۱/۳ میدانونو په توپیر سیالې لوبډلې ته ماتې ورکړه او لومړۍ بریا یې خپله کړه.
یادې سیالۍ د ورزش د ودې، ورزش ته د ځوانانو د هڅونې او غوره لوبغاړو موندلو په موخه پیل شوي دي چې یوه اوونۍ به دوام وکړي.
