دایکندي؛ په پاتو ولسوالۍ کې میوند تمزان لوبډله د والیبال سیالیو اتله شوه
د دایکندي ولایت د بدني روزنې او ورزش آمریت په همغږۍ او د پاتو ولسوالۍ د ځوانانو له لوري په یاد ولایت کې د دایکندي د څلورو غوره لوبډلو ترمنځ د والیبال سیالۍ ترسره شوې.
په یادو سیالیو کې چې د دوه اړخیزو سیالیو په نوم د تمزان بازار په ورزشي لوبغالي کې د دوه ورځو لپاره ترسره شوې، یوې لوبډلې له ارزګان او درې لوبډلو له دایکندي ولایت څخه ګډون کړی و.
د دغو سیالیو په پایلوبه کې میوند تمزان او ارزګان منتخبه لوبډلې له یو بل سره مخ شوې، چې میوند تمزان لوبډلې د ۳-۰ میدانونو په توپیر وګټله او اتلولي یې په خپل نوم کړه.
د یادو سیالیو موخه د ارزګان او دایکندي ولایتونو ترمنځ یووالی او د والیبال د مخکښو لوبغاړو پېژندل ښودل شوي دي.
