خوست کې د ١٨٥زره ډالرو په ارزښت يو ورزشي جمنازيوم جوړ شو
د خوست ولایت مرکز اړوند ١٢٠٠ فاميليو سیمه کې د افغان سوداګر اسماعیل سالار په مالي لګښت د ١٨٥زره امریکایي ډالرو په ارزښت د شيخ زاید په نوم یو ورزشي جمنازيوم جوړ او رسماً پرانیستل شو.
دغه جمنازيوم چې په یو وخت کې پکې دوه زره نندارچیان ځایږي؛ د فوټسال، والیبال او نورو ورزشونو جوګه دی چې د جوړېدو چارې يې په نهو میاشتو کې بشپړې شوې.
د ياد ورزشي جمنازیوم د پرانیستې په مراسمو کې د خوست ولایت ورزشي آمر، دولتي، چارواکو، لوبغاړو او د ورزش ګڼو مینوالو ګډون کړی و.
د دغه جمنازيوم د پرانیستې په ورځ د کابل او کوزې يښتونخوا لوبډلو ترمنځ د والیبال سیالۍ ترسره شوه، چې په پایله کې یې کابل لوبډلې د ٣/٠ میدانونو په توپیر خپلې سیالې لوبډلې ته ماتې ورکړه او بريا يې خپله کړه.
