خوست: د کرکټ اختريز ټورنمنټ د تندر لوبډلې په بريا سره پاى ته ورسېد
د خوست ولايت ګربز ولسوالۍ د کرکټ اختريز ټورنمنټ چې د دې ولسوالۍ اړوند مښې کلي کې چې له غلام خان بندر سره نېږدې موقعیت لري ترسره شو.
په دې ټورنمنټ کې ٢٠ لوبډلو ګډون درلود چې فاينل سياليو کې د خوست ورزشي مسوولینو، امنیتي چارواکو، قومي مشرانو، ځوانانو او د ورزش مينه والو برخه لرله.
د ياد ټورنمنټ پاى لوبې ته د تندر او ګل اباد خان شاهین لوبډلو لار ومونده چې لومړى توپ وهنه تندر لوبډلې وکړه.
تندر لوبډلې په ټاکل شويو اتو اورونو کې ١٦٨ منډې جوړې کړې او سيالې لوبډلې ته يې د ١٦٩ منډې هدف کېښود.
مقابلې لوبډلې په اوو اورونو کې ١٢٨ منډې جوړې کړې ، چې د باران ورېدو له کبله لوبه وځنډېده خو وروسته د پرېکړې پر اساس تندر لوبډله ددې اختریز جام ګټونکې لوبډله اعلان شوه.
د دې لوبو د پاى مراسم د کپونو، مډالونو او ډاليو په وېشلو سره پای ته ورسېدل.
