خوست؛ په باک ولسوالۍ کې د ۵۰ لوبډلو ترمنځ د ټېپ بال کرېکټ سيالۍ پای ته ورسېدې
د خوست ولایت د بدني روزنې او ورزش امريت له لوري د ياد ولايت د باک ولسوالۍ د شمل خېلو په سیمه کي د ۵۰ لوبډلو ترمنځ د ټېپ بال کرېکټ څلورم پړاو سيالۍ، چې دوې میاشتې مخکې پيل شوې وې پای ته ورسېدې.
د دغو سياليو پايلوبه د يعقوبيو خپلواک او مرکز فيضان لوبډلو ترمنځ ترسره شوه، د فيضان لوبډلې د پچې په ګټلو سره د توپ وهنې پریکړه وکړه چې په ټاکلو نهو اورونو کې داتو لوبغاړو په سوځېدو سره يې مقابلې لوبډلې ته د ۱۴۵ منډو هدف وټاکه. په ځواب کې د يعقوبيو خپلواک لوبډلې په نهو اورونو کې يې ۱۲۴ منډې جوړې کړې او لوبه يې د ۲۰ منډو په توپیر سره وبايلله.
د يادو سياليو موخه ورزش ته د ځوانانو هڅول و، د دغو سياليو په پای کې ګټونکي لوبډلې ته يوه عراده موټرسايکل ورکړل شو.
