خوست؛ منگل سټارز لوبډلې د " قوشتيپې کانال " په نوم د ټېپ بال کرکټ سياليو اتلولي وگټله
د خوست ولايت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري په کونډيو صحرا بازانو ورزشي ميدان کې د ۴۰ لوبډلو ترمنځ د " قوشتيپې کانال " په نوم د ټېپ بال کرکټ سيالۍ د منگل سټارز لوبډلې په اتلولۍ پای ته ورسېدې.
د يادو سياليو پايلوبه د منگل سټارز او صحرا بازانو لوبډلو ترمنځ ترسره شوه، چې په پايله کې منگل سټارز لوبډلې په ټاکلو لسو اورونو کې د اتو لوبغاړو په سوځېدو سره خپلې سيالې لوبډلې ته د ۱۲۸ منډو هدف کېښود، صحرا بازانو لوبډلې ياد هدف تر لاسه نه کړ او د ۴۸ منډو په توپير يې ماته ومنله.
دغه سيالۍ، چې شاوخوا يوه مياشت يې دوام وکړ، په پای کې د ياد ولايت د ورزش امريت له لوري لومړي او دويم مقام گټونکو لوبډلو ته کپونه او غوره لوبغاړو ته مډالونه او چمتو شوې ډالۍ ورکړل شوې.
