خوست؛ فولاد لوبډلې د تياکي کرېکټ ليگ سياليو اتلولي وگټله
د خوست ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د ځاځي ميدان ولسوالۍ په تياکي سيمه کې د شپږو لوبډلو ترمنځ د تياکي کرېکټ ليگ سيالۍ، چې يوه مياشت مخکې پيل شوې وې د فولاد لوبډلې په اتلولۍ پای ته ورسېدې.
د دغو سياليو پايلوبه د فولاد او تياکي ځوانانو لوبډلو ترمنځ ترسره شوه. تياکي ځوانانو لوبډلې د لوبې پچه وگټله او لومړی يې د توپ وهنې پرېکړه وگړه، چې په ټاکلو لسو اورونو کې يې د اتو لوبغاړو په سوځېدو سره سيالې لوبډلې ته د ۱۲۵ منډو هدف وټاکه، په مقابل کې فولاد لوبډلې ياد هدف د لوبې په وروستي اور کې ترلاسه کړ او د درې ویکټو په توپير يې اتلولي خپله کړه.
د ويلو وړ ده ،چې د يادو سياليو په پای کې لوبډلو او لوبغاړو ته بېلابېلې چمتو شوې ډالۍ ورکړل شوې.
