خوست؛ د ميس عينک زون له زرو زياتو لوبغاړو څخه ازموینه واخیستل شوه 

د افغانستان د نورو زونونو په څېر په مس عینک زون کې هم له زرو زياتو د نولس کلونو کم عمره لوبغاړو څخه ازموینه واخیستل شوه.
د افغانستان کرکټ بورډ د اعلان شوي مهالوېش سره سم له امو بند امیر او بست زونونو وروسته د خوست ولایت په ملي کرکټ لوبغالي کې د میس عینک زون اړوند خوست، پکتیا، پکتیکا ،لوګر او غزني ولایتونو د نولس کلونو څخه دکم عمره لوبغاړو د ازموینې دوه ورځنۍ لړۍ پیل شوه. 
د دغې ازموینې په لړ کې به په اعلان شوي معیار برابر لوبغاړي د نورو پړاوونو لپاره غوره شي.
د افغانستان کرکټ بورډ پلان لري، چې له دې لارې پیاوړي لوبغاړي ومومي او د دوی د عمر او استعداد مطابق یې د پرمختګ په موخه په بېلابېلو لوبډلو کې ځای پر ځای کړي.