جوزجان؛ شبرغان ښار کې د اتو لوبډلو ترمنځ د والیبال سیالۍ ترسره شوې
د جوزجان ولایت د بدني روزنې او ورزش امریت اړوند د والیبال ملي فدراسیون د استازولۍ له لوري د یاد ولایت د شبرغان ښار په خلوتي کلي کې د اتو لوبډلو ترمنځ د والیبال سیالۍ د اریغ جنګل لوبډلې په اتلولۍ پای ته ورسېدې.
د دغو سیالیو په پایلوبه کې د جنګل اریغ لوبډلې خپلې سیالې اتحاد لوبډلې ته د ۳/۱ میدانونو په توپير ماتې ورکړه او اتلولي یې خپله کړه.
د یادو سیالیو موخه د والیبال ورزش ته وده ورکول او د ورزشکارانو ترمنځ یووالی رامنځته کول و، چې درې ورځې یې دوام وکړ.
د سیالیو په پای کې غوره لوبډلې یو پسه او د اتلولۍ کپ او غوره لوبغاړو ته نغدي ډالۍ ورکړل شوې.
