جوزجان؛ خواجه دوکوه ولسوالۍ کې د شپږو لوبډلو ترمنځ د فوټسال سيالۍ پای ته ورسېدې
د جوزجان ولايت د بدني روزنې او ورزش امريت اړوند د فوټبال ملي فدراسیون د استازولۍ له لوري د ياد ولايت په خواجه دوکوه ولسوالۍ کې د شپږو لوبډلو ترمنځ د فوټسال سيالۍ، چې يوه اوونۍ مخکې پيل شوې وې د نظري اقچه کلب لوبډلې په اتلولۍ پای ته ورسېدې.
د دغو سياليو په پايلوبه کې د نظري اقچه کلب لوبډلې خپلې سیالې اتحاد اندخوی لوبډلې ته د ۳/۱ ګولونو په توپير ماتې ورکړه او اتلولي يې خپله کړه.
د يادو سياليو موخه د فوټسال ورزش ته د ځوانانو هڅوول او ځوانانو ته يوه سالمه تفرېح برابرول و.
د سياليو په پای کې غوره لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
