تخار؛ مرکز تالقان ښار کې د ۱۳ لوبډلو ترمنځ د فوټسال سيالۍ پای ته ورسېدې
د تخار ولايت د بدني روزنې او ورزش امريت اړوند د فوټبال ملي فدراسیون د استازولۍ له لوري د ياد ولايت په مرکز تالقان ښار کې د ۱۳ لوبډلو ترمنځ د فوټسال سيالۍ د شيوا لوبډلې په اتلولۍ پای ته ورسېدې.
دغو سياليو، چې ۱۵ ورځې يې دوام وکړ، په پايلوبه کې شيوا لوبډلې خپلې سیالې پيکان اف سي لوبډلې ته د ۶/۰ ګولونو په توپير ماتې ورکړه او اتلولي يې خپله کړه.
په دغو سياليو کې پيمان خليلي غوره لوبغاړی، عالم تاتار غوره ګول ساتونکی او احمد رشاد د زياتو ګولونو وهونکی او د اخلاقو کپ بيا قطعه خاص لوبډلې ته ورکړل شو.
د يادو سياليو موخه د فوټسال غوره ليګ ته د غوره لوبډلې موندل و؛ د سياليو په پای کې غوره لوبډلې او لوبغاړو ته چمتو شوې ډالۍ ورکړل شوې.
