تخار؛ خواجه بهاالدین ولسوالۍ کې د شپږو لوبډلو ترمنځ د فوټسال سیالۍ پای ته ورسېدې
د تخار ولایت د بدني روزنې او ورزش امریت اړوند د فوټبال فدراسیون د استازولۍ له لوري د یاد ولایت په خواجه بهاالدین ولسوالۍ کې د شپږو لوبډلو ترمنځ د فوټسال سیالۍ د امید لوبډلې په اتلولۍ پای ته ورسېدې.
د دغو سیالیو په پایلوبه کې د خواجه بهاالدین امید لوبډلې خپلې سیالې رستاق ولسوالۍ لوبډلې ته د ۷/۴ ګولونو په توپیر ماتې ورکړه او اتلولي یې خپله کړه.
د یادو سیالیو موخه د ځوانانو ترمنځ د فوټسال ورزش ته وده ورکول و، چې یوه اوونۍ یې دوام وکړ.
د سیالیو په پای کې د تخار ورزشي امریت له لوري غوره لوبډلې ته د اتلولۍ جام او غوره لوبغاړو ته بېلا بېلې ورزشي ډالۍ ورکړل شوې.
