بلخ کې د ۱۶۰ ورزشکارانو ترمنځ د موی تای سیالۍ وشوې
د بلخ ولایت د بدني روزنې او ورزش ریاست اړوند د موی تای فدراسیون د استازولۍ له لوري د یاد ولایت په مرکز مزارشريف ښار کې له شمال او شمال ختيځ زون ولايتونو د ۱۶۰ ورزشکارانو ترمنځ د موی تای سیالۍ وشوې.
دغه سیالۍ په بېلا بېلو وزني کټگوریو کې ترسره شوې، چې په پایله کې ۸۰ ورزشکارانو خپلو سیالانو ته په ماتې ورکولو بریاوې خپلې کړې او د کمربندونو او مډالونو گټونکي شول.
د یادو سیالیو موخه د ورزشکارانو ترمنځ یووالی رامنځته کول او راتلونکو سياليو ته لا ښه چمتووالی و، چې یوه ورځ او شپه یې دوام وکړ.
