بلخ ؛ په مزار شريف ښار کې د ۱۳۵چاپندازانو ترمنځ د وزلوبې سيالۍ ترسره شوې
د بلخ ولايت د بدني روزنې او ورزش رياست اړوند د وزلوبې،نيزه وهنې او سيمه ييزو لوبو ملي فدراسيون د استازولۍ له لوري د ياد ولايت په مزار شريف ښار کې د ۱۳۵ چاپندازانو ترمنځ د وزلوبې سيالۍ ترسره شوې.
د دغو سياليو په پايله کې د ميدان د حکم له لوري دوه اخرالاقه اعلان شول، چې لومړی يې سرور پهلوان د حاجي ملا يوسف بغلاني په آس او دويم اخرالاق ګلبدين پهلوان د قومندان شمس الحق ناصري په آس د حلالې تر دايرې ورساوه او د سياليو گټونکي شول.
د دغو سياليو د ترسره کېدو موخه د راتلونکو سياليو لپاره د چاپندازانو لا ښه چمتو والی او د ياد ولايت وگړو ته د سالمې تفريح برابرول و، چې يوه ورځ يې دوام وکړ.
