بلخ؛ د وزلوبې ټورنمنټ نیمه پایلوبې ته څلورو لوبډلو لار ومونده
په بلخ کې د وزلوبې سیالیو په دوام نن یکشنبه د اتو غوره لوبډلو ترمنځ څلور سیالۍ ترسره شوې، چې په دې سره نیمه پایلوبې ته څلورو لوبډلو لار پیدا کړه.
د نن ورځې لومړۍ سیالي د بلخ او لوګر لوبډلو ترمنځ وه، چې د ۶ – ۱ امتیازونو په توپير بلخ لوبډلې وګټله.
دویمه سیالي د بغلان او فاریاب لوبډلو ترمنځ وشوه، چې دا سیالي په ټاکلي وخت کې د ۳ – ۱ امتیازونو په توپیر بغلان لوبډلې وګټله.
درېیمه سیالي د بدخشان او تخار ترمنځ ترسره شوه، چې له ۴ – ۰ پایلې سره بدخشان لوبډلې وګټله او د نن ورځې په څلورمې او وروستۍ سیالي کې بیا د سرپل او بامیان چاپندازان یو د بل پر وړاندې میدان ته ښکته شول، چې په پایله کې یې د ۱۱ – ۲ امتیازانو په توپیر سره سرپل لوبډلې په خپلې بریا پای ته ورسوله.
د یادو سیالیو نیمه پایلوبې ته بلخ، بغلان، بدخشان او سرپل لوبډلو لار ومونده.
په نیمه پایلوبې کې بغلان د بدخشان او بلخ بیا د سرپل پر وړاندې سیالۍ ترسره کوي او ګټونکې لوبډلې به پایلوبې ته لار ومومي.
لومړۍ نیمه پایلوبه به د دوشنبې په ورځ د بغلان او بدخشان لوبډلو ترمنځ د مزار شریف د حاجي مقیم بای د وزلوبې په لوبغالي کې ترسره شي.
