بغلان؛ پلخمري ولسوالۍ کې د ټېنس بال کرېکټ سیالۍ د بالادوري اکاخېلو په بریا پای ته ورسېدې
د بغلان ولایت مرکز پلخمري ولسوالۍ اړوند حسین خېلو لېسه کې د ۲۰ لوبډلو ترمنځ د ټېنس بال کرېکټ سیالۍ پای ته ورسېدې.
یادې سیالۍ چې ۱۶ ورځې مخکې پیل شوې وې، پایلوبه یې د افغان ټایګر او بالادوري اکاخېلو لوبډلو ترمنځ ترسره شوه، چې په پایله کې بالادوري اکاخېلو لوبډلې خپلې سیالې افغان ټایګر لوبډلې ته ماتې ورکړه او اتلولي یې په خپل نوم کړه.
د دغو سیالیو د پایلوبې مراسمو ته د بغلان ولایت د بدني روزنې او سپورت آمر، د بغلان کرکټ ادارې استازی، د پښتون زلمیو کلپ مالک اتل حسین خیل او ګڼ شمیر مشرانو او د کرکټ مینه والو ګډون کړی و.
د سیالیو په پای کې غوره لوبغاړو او لوبډلو ته چمتو شوې ډالۍ ورکړل شوې.
