بغلان؛ دوشي ولسوالۍ کې د ۱۶ لوبډلو ترمنځ د ټېپ بال کرېکټ سيالۍ پای ته ورسېدې
د بغلان ولایت د بدني روزنې او ورزش امريت په همکارۍ د ياد ولايت په دوشي ولسوالۍ کې د ۱۶ لوبډلو ترمنځ د ټېپ بال کرېکټ سيالۍ، چې دوې اوونۍ مخکې پيل شوې وې د نقيب سټار لوبډلې په اتلولۍ پای ته ورسېدې.
د يادو سیالیو پایلوبه د نقيب سټار او کيلگي ځوانانو لوبډلو ترمنځ ترسره شوه، نقيب سټار لوبډلې د لوبې پچه وگټله او لومړی يې د توپ وهنې پرېکړه وکړه، چې په ټاکلو شپږو اورونو کې يې سيالې لوبډلې ته د ۷۹ منډو هدف وټاکه، په مقابل کې کيگلي ځوانانو لوبډلې د ټولو لوبغاړو په سوځېدو سره يواځې ۴۰ منډې وکړې او لوبه يې د ۳۹ منډو په توپير وبايلله.
د يادولو وړ ده، چې د دغو سياليو موخه د ځوانانو لپاره د يوې سالمې تفريح برابرول وو.
