بامیان؛ ورس ولسوالۍ کې د ۲۰ لوبډلو ترمنځ د فوټبال سيالۍ د جوانان جوقل لوبډلې په اتلولۍ پای ته ورسېدې
د باميان ولايت د بدني روزنې او ورزش امريت اړوند د فوټبال ملي فدراسیون د استازولۍ له لوري د ياد ولايت په ورس ولسوالۍ کې د ۲۰ لوبډلو ترمنځ د فوټبال سيالۍ د جوانان جوقل لوبډلې په اتلولۍ پای ته ورسېدې.
د دغو سياليو په پايلوبه کې جوانان جوقل لوبډلې خپلې سیالې سراب اف سي لوبډلې ته د ۵/۴ ګولونو په توپير ماتې ورکړه او اتلولي يې خپله کړه.
د يادو سياليو موخه د فوټبال لوبو ته وده ورکول او د ځوانانو ترمنځ يووالی رامنځته کول و، چې يوه اونۍ يې دوام وکړ.
د سياليو په پای کې د باميان ورزشي امريت له لوري غوره لوبډلې ته د اتلولۍ جام او غوره لوبغاړو ته ورزشي ډالۍ ورکړل شوې.
