بادغیس؛ مرکز قلعه نو ښار کې د ۶۶ ورزشکارانو ترمنځ د کورش سامبو ملي لوبډلې ټاکنیزې سیالۍ پای ته ورسېدې
د بادغیس ولایت د بدني روزنې او ورزش امریت اړوند د کورش ملي فدراسیون د استارولۍ له لوري د یاد ولایت په مرکز قلعه نو ښار کې له ۱۱ ولایتونو د ۶۶ ورزشکارانو ترمنځ د مشرانو په عمري کټګورۍ کې د کورش سامبو ملي لوبډلې ټاکنیزې سیالۍ د غوره لوبغاړو په موندلو پای ته ورسېدې.
د دغو سیالیو په پایله کې د بادغیس ولایت ورزشکارانو د دوو د سرو زرو، دوو د سپینو زرو او دوو د برونزو مډالونو په ترلاسه کولو لومړی، د هرات ولایت ورزشکارانو دوو د سرو زرو، یو د سپینو زرو او دوو د برونزو مډالونو په ترلاسه کولو دویم او د فراه ولایت ورزشکارانو یو د سرو زرو، یو د سپینو زرو او دوو د سرو زرو مډالونو په ترلاسه کولو درېیم مقام ترلاسه کړ.
د یادو سیالیو موخه د کورش سامبو ملي لوبډلې ته د غوره لوبغاړو موندل و، چې درې ورځې یې دوام وکړ.
د سیالیو په پای کې د ورزش مسوولینو له لوري ټاکل شوو ورزشکارانو ته چمتو شوې ډالۍ ورکړل شوې.
