بادغیس؛ قادس ولسوالۍ کې شپږو لوبډلو ترمنځ د والیبال سیالۍ د آریانا لوبډلې په اتلولي پای ته ورسېدې
د بادغیس ولایت د بدني روزنې او ورزش آمریت اړوند د والیبال فدراسیون د استازولي له لوري د یاد ولایت په قادس ولسوالۍ کې د شپږو لوبډلو ترمنځ د یووالي جام په نوم د والیبال سیالۍ چې دوې اوونۍ مخکې پیل شوې وې، د آریانا لوبډلې په اتلولي پای ته ورسېدې.
د یادو سیالیو پایلوبه د آریانا او باختر ځوانانو لوبډلو ترمنځ ترسره شوه، چې په پایله کې آریانا لوبډلې د ۳ پر یو میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه او همداراز باختر ځوانانو لوبډلې دویم او د لنګر شریف لېسې لوبډلې بیا درېیم مقام ترلاسه کړ.
یادې سیالۍ د والیبال لوبې د ودې، ورزش ته د ځوانانو د هڅولو او له مخدره توکو څخه د لېرې والي په موخه ترسره شوې، چې په پای کې د یاد ولایت د ورزشي آمریت له لوري غوره لوبډلو ته چمتو شوې ډالۍ ورکړل شوې.
