ایران؛ تهران کې د سل افغان مهاجرو ورزش کارانو ترمنځ د کورش ټاکنیزې سیالۍ ترسره شوې
په ایران کې د افغان مهاجرو ورزشکارانو لپاره د المپیک، بدني روزنې او سپورټ عمومي ریاست د استازولۍ له لوري د یاد هیواد په پلازمېنه تهران کې د اوو استانونو د ۱۰۰ ورزشکارانو ترمنځ د افغان مهاجرو منتخبې لوبډلې لپاره د کورش ټاکنیزې سیالۍ ترسره شوې.
په دغو سیالیو کې له سمنان،کرمان، البرز، یزد، قُم، همدان او تهران آستانونو څخه د مشرانو په عمري او له ۶۰ کیلو ګرامه څخه تر ۱۰۰+ کیلو ګرامه وزني کټګوریو کې ۱۰۰ ورزش کارانو ګډون کړی و، چې په پایله کې یې اته ورزش کاران په ایران کې د افغان مهاجرو ورزش کارانو د کورش لوبډلې ته وټاکل شول.
یادې سیالۍ د کورش آسیايي لوبو ته د لوبډلې د ټاکلو په موخه ترسره شوې چې یوه ورځ یې دوام وکړ.
