ارزگان؛ سپين غر بازانو لوبډلې د اختریز جام په نوم د ټېپ بال کرکټ سياليو اتلولي وگټله
د ارزگان ولايت د بدني روزنې او ورزش امريت په همغږۍ د ياد ولايت په دهراود ولسوالۍ کې د لسو لوبډلو ترمنځ د اختريز جام په نوم د ټېپ بال کرکټ سيالۍ د سپين غر بازانو لوبډلې په اتلولۍ پای ته ورسېدې.
د دغو سياليو پايلوبه د سپين غر بازانو او ځلاند لوبډلو ترمنځ ترسره شوه، ځلاند لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۸۹ منډو هدف کېښود، سپين غر بازانو لوبډلې ياد هدف د لوبې په اووم اور کې ترلاسه کړ او بريا يې خپله کړه.
د يادونې وړ ده، چې دغو سياليو شاوخوا لس ورځې دوام وکړ.