ارزګان؛ مرکز ترينکوټ ښار کې د ٢٤ لوبډلو ترمنځ د ټېپ بال کرېکټ سیالۍ پای ته ورسېدې

د ارزګان ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت مرکز ترينکوټ ښار کې د ۲٤ لوبډلو ترمنځ د ټېپ بال کرېکټ شپنۍ سیالۍ د منصور اتلانو لوبډلې په اتلولي پای ته ورسېدې.
د یادو سیالیو پایلوبه د شیر افغان او منصور اتلانو لوبډلو ترمنځ ترسره شوه. د لوبې پچه شیر افغان لوبډلې وګټله او لومړی یې توپوهنه وکړه، چې په ټاکلو نهو اورونو کې یې د شپږو ویکټو په زیان خپلې سیالې لوبډلې ته د ٧٥ منډو هدف وټاکه. منصور اتلانو لوبډلې ټاکلی هدف د څلورو ویکټو په زيان د لوبې په شپږم اور کې ترلاسه کړ او د سیالیو اتلولي یې وګټله.
دا سیالۍ د سیمې د ځوانانو لپاره د سالمې تفرېح برابرولو په موخه ترسره شوې، چې د ٢٧ ورځې یې دوام وکړ.