ننګرهار؛ بهسودو ولسوالۍ کې د ۱۶ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولي له لوري د یاد ولایت په بهسودو ولسوالۍ کې د ۱۶ لوبډلو ترمنځ د ټېپ بال کرکېټ سیالۍ د سمیر لوبډلې په اتلولي پای ته ورسېدې.
د یادو سیالیو پایلوبه د سمیر کلب او بهسودو مبارز ځوانانو لوبډلو ترمنځ ترسره شوه. د لوبې پچه سمیر لوبډلې وګټله او لومړی یې د توپ وهنې پرېکړه وکړه، چې په ټاکلو لسو اورونو کې یې د خپلو پنځو لوبغاړو په له لاسه ورکولو سره خپلې سیالې لوبډلې ته د ۱۶۶ منډو هدف وټاکه. مبارز ځوانانو لوبډلې د هدف په تعقیب کې په لسو اورونو کې د خپلو اتو لوبغاړو په له لاسه ورکولو سره ۱۱۸ منډې وکړې او سمیر لوبډلې د ۴۷ منډو په توپیر خپلې سیالې لوبډلې ته په ماتې ورکولو سره د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې یوه میاشت یې دوام وکړ او په پای کې اتلې لوبډلې ته د اتلولي کپ او غوره لوبغاړو ته بېلابېلې ډالۍ ورکړل شوې.
