هلمند؛ ګرمسېر ولسوالۍ کې د ۱۱ لوبډلو ترمنځ د ټېپ بال کرېکټ سیالۍ پیل شوې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري د یاد ولایت د ګرمسېر ولسوالۍ په هزار جفت سیمه کې د ۱۱ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د نورزي اتلانو او محبوب الله لوبډلو ترمنځ ترسره شوه. د لوبې پچه نورزي اتلانو لوبډلې وګټله او لومړی یې توپوهنه وکړه، چې په ټاکلو ۱۲ اورونو کې یې د خپلو اتو لوبغاړو په له لاسه ورکولو سره خپلې سیالې لوبډلې ته د ۱۵۲ منډو هدف وټاکه. محبوب الله لوبډلې د خپلو اوو لوبغاړو په له لاسه ورکولو سره ټاکلی هدف پوره کړ او د درې ویکټو په توپیر یې د دغو سیالیو لومړۍ لوبه وګټله.
دا سیالۍ د ځوانانو ترمنځ د یووالي د رامنځته کولو په مخه پیل شوي دي، چې ۲۰ ورځې به دوام وکړي.
