خوست کې د څلورو لوبډلو ترمنځ د فوټبال سیالۍ پای ته ورسېدې
د خوست ولایت د بدني روزنې او ورزش آمریت اړوند د فوټبال فدراسیون د استازولي له لوري د یاد ولایت مرکز اړوند تاترې سیمه کې د څلورو لوبډلو ترمنځ د فوتبال سیالۍ د ګربزو منتخبې لوبډلې په اتلولي پای ته ورسېدې.
په دغو سیالیو کې تاترې، نبي ورغه، شاهین او ګربزو منتخبې لوبډلو ګډون کړی و، چې پایلوبه یې د ګربزو منتخبې او شاهین کلب لوبډلو ترمنځ ترسره شوه او په پایله کې یې ګربزو منتخبې لوبډلې د یو پر صفر ګول په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دا سیالۍ ورزش ته د نویو ځوانانو د هڅولو په موخه ترسره شوې، او په پای کې یې اتلې لوبډلې ته د اتلولي کپ او غوره لوبغاړو ته مډالونه او نورې ډالۍ ورکړل شوې.
