کابل؛ د ۱۰۰ ورزشکارانو ترمنځ د جمناستیک اتلسم پړاو ټاکنیزې سیالۍ پای ته ورسېدې
د المپیک کمېټې، بدني روزنې او ورزش عمومي ریاست اړوند د جمناستیک ملي فدراسیون له لوري د یاد ریاست په ۵۰۰ کسیز جنمازیو کې د کابل ښار له پنځلسو کلبونو د ۱۰۰ ورزشکارانو ترمنځ د جمناستیک اتلسم پړاو ټاکنیزې سیالۍ پای ته ورسېدې، چې دوې ورځې یې دوام وکړ.
دغه سیالۍ د تنکیو ځوانانو، نویو ځوانانو، ځوانانو او د مشرانو ورزشکارانو په عمري کټګوریو کې ترسره شوې، چې په پایله کې پنځلس ورزشکاران د مشرانو له کټګورۍ، دولس ورزشکاران د ځوانانو له کټګورۍ او شل ورزشکاران د تنکیو ځوانانو او نویو ځوانانو له کټګوریو څخه د کابل ښار جمناستیک منتخبې لوبډلې ته وټاکل شول.
د یادو سیالیو موخه د کابل ښار جمناستیک منتخبې لوبډلې ته د غوره لوبغاړو موندل و، چې تمه ده دوې میاشتې وروسته به په ملي لوبو کې هم ګډون وکړي.
