هلمند؛ په گرمسېر ولسوالۍ کې د ۱۶ لوبډلو ترمنځ د ټېپ بال کرکټ سيالۍ پای ته ورسېدې
د هلمند ولايت د بدني روزنې او ورزش آمريت اړوند د ټېپ بال کرکټ فدراسيون د استازولۍ له لوري د گرمسېر ولسوالۍ په لکي حوزه کې د ۱۶ لوبډلو ترمنځ ورزش ته د ځوانانو هڅولو په موخه د ټېپ بال کرکټ سيالۍ، چې يوه مياشت مخکې پيل شوې وې، د خپلواک يارانو لوبډلې په اتلولۍ پای ته ورسېدې.
د يادو سياليو پايلوبه د خپلواک يارانو او زرغون لکي لوبډلو ترمنځ ترسره شوه، چې خپلواک يارانو لوبډلې د لوبې پچې په گټلو سره په ټاکلو ۱۲ اورونو کې سيالې لوبډلې ته د ۱۵۳ منډو هدف وټاکه، په مقابل کې زرغون لکي لوبډلې د ټولو لوبغاړو په سوځېدو سره ۱۲۸ منډې وکړې او لوبه يې د ۲۵ منډو په توپير وبايلله.
د يادولو وړ ده، چې د دغو سياليو غوره توپ وهونکی حبيب عليزی، غوره توپ اچوونکی عبدالقوي عليزی او غوره لوبغاړی بيا زبير احمد دانش ونومول شول.
