د افغانستان د فوټبال شل کلنو کم عمره ملي لوبډلې د اسیا مرکزي اتلولۍ سیالیو کې خپله لومړۍ لوبه قرقیزستان هېواد ته وبایلله
د قرقیزستان د جلال اباد ښار په ورزشي لوبغالي کې د اسیا مرکزي اتلولۍ دویم پړاو سیالیو کې د افغانستان د فوټبال شل کلنو کم عمره ملي لوبډلې خپله لومړۍ لوبه د ۴/۰ ګولونو په توپیر سیالې قرقیزستانۍ فوټبال ملي لوبډلې ته وبایلله.
د اسیا مرکزي اتلولۍ دویم پړاو سیالیو کې افغانستان، ایران، قرقیزستان، ترکمنستان، تاجکستان او ازبکستان هېوادونو په دوه ګروپونو کې ګډون لري، چې د هر ګروپ لومړۍ لوبډله به وروستي پړاو ته لار پیداکړي، د ګروپ دویم مقام لوبډلې به درېیم مقام لپاره اود ګروپ درېیم مقام لوبډلې به د پینځم مقام لپاره هم سیالۍ کوي.
په A ګروپ کې د افغانستان سره قرقیزستان او تاجکستان هېوادونه دي.
د اسیا مرکزي اتلولۍ دویم پړاو سیالۍ، چې تېرې جمعې په ورځ د چنګاښ میاشتې په ۱۵ نېټه د قرقیزستان د جلال اباد ښار په ورزشي لوبغالي کې پیل شوې د چنګاښ میاشتې تر ۲۲ نېټې به دوام وکړي.
