خوست کې د رمضان جام په نوم د ټېنس بال کرکټ سیالۍ د اکاکلي لوبډلې په اتلولي پای ته ورسېدې
د خوست ولایت د بدني روزنې او ورزش آمریت اړوند د ټېنس بال کرکټ فدراسیون د استازولي له لوري د یاد ولایت په ځاځي میدان ولسوالۍ کې د ۳۲ لوبډلو ترمنځ د ټېنس بال کرکټ سیالۍ د اکاکلي لوبډلې په اتلولي پای ته ورسېدې.
د یادو سیالیو پایلوبه د اکاکلي او سپین څلي لوبډلو ترمنځ ترسره شوه، چې اکاکلي لوبډلې د ټاس په ګټلو سره لومړی توپ وهنه وکړه او په ټاکلو لسو اورونو کې یې د شپږو لوبغاړو په له لاسه ورکولو سره خپلې سیالې لوبډلې ته د ۱۳۸ منډو هدف وټاکه خو مقابلې لوبډلې د هدف په تعقیب کې ۱۲۰ منډې وکړې او لوبه یې د ۱۷ منډو په توپیر وبایلله.
د سیالیو د پای په مراسمو کې اتلې لوبډلې ته یو پسه او دویم مقام ته نغدې پیسې د ډالۍ په توګه ورکړل شوې.
