میدان وردګ؛ د کرکټ ټېپ بال ولایتي لوبډلې د غوراوي سیالۍ پای ته ورسېدې
د میدان وردګ ولایت د ورزش امریت په همکارۍ د ټېپ بال فدراسیون له لوري د شفا پوهنتون په مالي لګښت په چک ولسوالۍ کې د ټېپ بال کرکټ ولایتي لوبډلې د غوراوي سیالۍ، چې د ۱۲لوبډلو ترمنځ یوه اوونۍ وړاندې پیل شوې وې، پای ته ورسېدې.
په دغو سیالیو کې د سیدآباد، جلریز، مرکز، نرخ، چک، جغتو او دایمیردادو ولسوالیو ۱۲لوبډلو برخه لرله چې پایلوبه یې د سید اباد زلمیو او د سید اباد اتلانو لوبډلو ترمنځ وشوه د سید اباد زلمیو لوبډلې لومړی توپوهنه وکړه، په ټاکلو لسو اورونو کې یې ۱۰۸منډې وکړې.
په مقابل کې د سیداباد اتلانو لوبډلې ورکړل شوی هدف د ټولو لوبغاړو په سوځېدو سره پوره نه کړ او لوبه یې د سیداباد زلمیو لوبډلې ته وبایلله.
د دغو سیالیو په پايله کې د سیداباد زلمیو لوبډلې لوبغاړی سباوون د ټورنمنټ غوره لوبغاړی، د چک زلمیو لوبډلې لوبغاړی سیف الرحمن د غوره بالر او د جغتو لوبډلې لوبغاړی بلال خان د غوره لوبغاړي به توګه وټاکل شول.
د یادو سیالیو موخه د ولایت په کچه ورزش ته وده ورکول او د ټېپ بال د منتخبې لوبډلې ټاکل دي.
