هلمند؛ په مارجې ولسوالۍ کې د کرکټ ټېپ بال سيالۍ سپين غر لوبډلې په اتلولۍ پاى ته ورسېدې
د هلمند ولایت په مارجې ولسوالۍ کې د دې ولسوالۍ اړوند کمپ سيمه کې د اختريز جام په نوم د کرکټ ټېپ بال ١٢ اوريزه سيالۍ د سپين غر لوبډلې په ګټه پاى ته ورسېدې.
د مارجې ولسوالۍ د ټېپ بال کرکټ امر ډاکتر محمد ابراهيم په خبره؛ دغه سيالۍ د اختر په دوهمه پيل شوې چې لس ورځې يې دوام وکړ، چې د مرکز لشکرگاه ترڅنګ د نادعلي، باباجي، ګرمسېر ولسواليو او د نيمروز ولايت ٣٢ لوبډلو پکې برخه لرله.
د دغو سياليو پايلوبې ته د سپين غر او کليوال زلمي لوبډلو لار وموندله، چې د سپين غر لوبډلې د لوبې ټاس وګټلو او لومړى يې توپوهنه وکړه چې په ټاکلو ١٢ اورونو کې يې د ٥ لوبغاړو په سوځیدو سره ١٩٥ منډې وکړې.
په مقابل کې د کليوال زلمي لوبډلې د ټولو لوبغاړو په سوځیدو سره ١٣٥ منډې وکړې او لوبه يې د ٥٨ منډو په توپیر بايلوده.
د يادو سياليو موخه د ځوانانو ترمنځ اتحاد او يووالى دى.
په پاى کې د لومړي مقام ګتونکې لوبډلې ته يو عراده موټرسايکل او دويم مقام ګټونکې لوبډلې ته کپ ورکړل شو.
