خوست: لکڼ منتخبې لوبډلې د کرکټ شل اوريزو سياليو اتلولي خپله کړه
د کرکټ ملي لوبډلې پخواني لوبغاړي شهید رحمت ولي مسرور په نوم د خوست ولایت مرکز او ولسوالیو په کچه د کرکټ شل اوریزه سیالیو اتلولي د لکڼ منتخبې لوبډلې خپله کړه.
د دې سياليو پایلوبه د لکڼو او متون منتخبو لوبډلو ترمنځ ترسره شوه چې لکڼو منتخبې لوبډلې په زړه پورې لوبې وروسته مرکز متون لوبډلې ته د پنځو وېکټو په توپیر سره ماتې ورکړه.
متون منتخبې لوبډلې لومړۍ توپ وهنه وکړه چې په ۱۹.۴ اورونو کې یې د ټولو لوبغاړو په سوځېدو سره، د انځرګل نیازي ۵۱ او فریدالله ۳۸ منډو پرمټ ۱۳۶ منډې جوړې کړې او سیالې لوبډلې ته یې د ۱۳۷ منډو هدف کېښود.
لکڼ لوبډلې ته په توپ اچوونه کې عمر محمدي درې او بختورخان دوه ویکټې ترلاسه کړې.
په ځوابي لوبه کې لکڼو منتخبې لوبډلې د سیالۍ وروستي اور کې ټاکلی هدف ترلاسه او لوبه یې د پنځو ویکټو په توپیر خپله کړه.
دوی ته په توپ وهنه کې احسان لکڼوال ۳۸، حضرت الله ۳۳ او ولي الرحمن ۳۸* ناسوځېدلې منډې جوړې کړې.
د متون منتخبې لوبډلې له پاره په توپ اچوونه کې خالدخان او ثاقب خان دوه دوه لوبغاړي وسوځول.
د کرکټ دغو سياليو غوره لوبغاړی عمر محمدي غوره توپ اچوونکی نسیم ګربز او همداراز غوره توپ وهونکی بيا لطیف الدین رنځور ونومول شول.
د یادو سیالیو موخه کلو او بانډو ته د مسلکي کرکټ لېږد او دودولو ترڅنګ د ځوانو استعدادونو موندنه ده.
