د فوټبال فدارسیون فني مرستیال حافظ احمد جان ځدراڼ د فیفا له رئیس جیاني انفانتینو سره ولیدل
د هیواد د ورزش ادارې او فوټبال فدراسیون فني مرستیال حافظ احمد جان ځدراڼ د اذربایجان هیواد په کوربتوب د فوټبال نړیوال فیسټوال په څنډه کې د فیفا ( فوټبال نړيوال فدراسیون) له رئیس جیاني انفانتینو Gianni Infantinoسره ولیدل.
په دې لیدنه کې ښاغلي ځدراڼ د افغانستان د فوټبال فدراسیون پر داخلي سیالیو، لاسته راوړنو او امکاناتو خبرې وکړې او معلومات یې وړاندې کړل، همدارنګه یې د افغانستان د فوټبال فدراسیون ځینې اړتیاوې هم مطرح کړې.
د فوټبال نړیوال فدراسیون ( فیفا) رئیس په خبرو کې د افغانستان له فوټبال څخه ملاتړ څرګند کړ او وې ویل چې دوی به د افغانستان فوټبال ته نوره پاملرنه هم وکړي او په نږدې راتلونکې کې به د لا همکارۍ په موخه خپل هیئت هم افغانستان ته واستوي.
د یادونې وړ ده، چې د فوټبال نړیوال فدراسیون رئیس د افغانستان له ۱۵ کلنو د کم عمره فوټبال لوبډلې لوبه هم له نږدې ننداره کړه.
