اتلتیکو بیلبائو اسپانیول ته ماته ورکړه
د اسپانیا د لالیګا د ۲۳مې اونۍ په وروستۍ لوبه کې، تېره شپه د اتلتیکو بیلبائو او اسپانیول د فوټبال د ټیمونو د سن مامس په لوبغالي کې سره مخامخ شول، چې دا لوبه د اتلتیکو بیلبائو په ګټه ۲ - ۱ پایلې پای ته ورسېده.
په دې لوبه کې اسپانیول لومړی په درېیمه دقیقه کې د توني ویلهنا په ګول سره مخکښ شو، خو په پنځمه دقیقه کې ایوهان سانسټ د اتلتیکو بیلبائو لپاره ګول وواهه او لوبه یې مساوي کړه.
خو ۱۱ دقیقې وروسته، انیګو مارتینیز د اتلتیک بیلبائو لپاره دویم ګول ترسره کړ ، چې دې لوبډلې ته یې په فصل کې اتمه بریا ور په برخه کړه او د ۳۴ امتیازو په لرلو سره د جدول په اتم ځای ته وسېده.
اسپانیول، چې په دې فصل کې د لسم ځل لپاره ماتې وخوړه، د 27 امتیازو سره په 13 ځای کې پاتې شو.