د HATKO ترکي شرکت انجينرانو لوګر او غزني کې د فوټبال لوبغالو جوړولو په موخه له ټاکل شویو ځمکو څخه لیدنه وکړه
د افغانستان فوټبال ملي فدراسیون سره په همغږۍ د فوټبال نړيوالې او اسيايي شورا د ترکې هېواد د HATKO شرکت انجينرانو لوګر او غزني کې د فوټبال لوبغالو د جوړونې په موخه له ټاکل شویو ځمکو څخه لیدنه وکړه، چې په نږدې راتلونکي کې به يې چارې پيل شي.
پر دغو دوو لوبغالو سربېره د کندهار، هرات او مزار ولایتونو د فوټبال سټېډیمونو ته د فيفا له لوري مصنوعي چمنونه او نور اړين توکي را استول شوي، چې د دغو چمنونو لومړنۍ چوپه دوه ورځې وړاندې هرات ته را ورسېده او ژر به یادو ولایتونو ته ورسول شي.
د لوګر د فوټبال فدراسيون د مسولینو د معلوماتو له مخې د لوګر لوبغالی به په درې پړاونو کې په اساسي ډول ورغول شي، چې په لومړي پړاو کې به يې چمن او جالۍ جوړې شي، په دویمه مرحله کې به يې دفترونه، د لوبغاړو د لباس بدلولو ځای او تشنابونه جوړ شي او په وروستۍ یا درېيم پړاو کې به يې د لوبغالي احاطه او نور اړين کارونه ترسره شي.
