کابل؛ د فوټسال ملي لوبډله له يو کال وروسته هېواد ته راغله او تود هرکلی يې وشو
د المپيک، بدني روزنې او ورزش عمومي رياست اړوند د فوټبال ملي فدراسیون د فوټسال کمېټې له لوري له ايران هېواد څخه د فوټسال ملي لوبډلې د ښه راغلاست مراسم ترسره شول.
يادې لوبډلې د اندونيزيا په کوربتوب د ۲۰۲۶ کال د اسيا ملتونو جام سياليو ته د لا ښه چمتووالي په موخه ۱۷ ورځې وړاندې د ايران په مشهد ښار کې تمرينات پيل کړي وو، چې اوس د اسیا ملتونو جام سیالیو کې د ګډون او چمتووالي په موخه لومړی هرات ولايت ته او له هغه ځايه کابل ته راغله.
د فوټسال دغه ملي لوبډله له يو کال وروسته افغانستان ته راغله او په کابل کې د فوټسال کمېټې په ورزشي جمنازيوم کې به له دوو ورځو تمريناتي کمپ وروسته او د اسیا ملتونو جام سياليو وړاندې ويتنام هېواد ته سفر وکړي او له ياد هېواد سره به د روان کال د جنورۍ په ۱۸ نېټه يوه دوستانه سيالي وکړي.
د يادونې وړ ده، چې اسیا ملتونو جام سيالۍ به د روان ميلادي کال د جنورۍ میاشتې په ۲۸ نېټه د اندونيزيا په کوربتوب د اسيا بېلابېلو هېوادونو ترمنځ پیل شي.
