بغلان کې ۱۲۵ ورزشکارانو او روزونکو ته اسلامي او فکري روزنيز سيمينار پيل شو
د المپيک، بدني روزنې او ورزش عمومي رياست اړوند د دعوت او ارشاد رياست له لوري د بغلان د ورزش آمريت د غونډو په تالار کې ۱۲۵ ورزشکارانو او روزونکو ته اسلامي او فکري روزنيز دوه ورځنی سيمينار پيل شو.
د دعوت او ارشاد رياست د مسؤلینو په وينا:« دا لړۍ يې د هېواد په شمالي ولايتونو کې نن رسماً په بغلان ولايت کې د بېلابېلو ورزشي رشتو ورزشکارانو او روزونکو ته پيل کړه، چې په نږدې وختونو کې به شاوخوا ۵۶۴۰ ورزشکارانو او روزونکو ته په ټول هېواد کې دغه ډول روزنيز سيمينارونه ورکړل شي.»
د ياد سمينار د پيل په مراسمو کې د بغلان ولايت د بدني روزنې او ورزش آمر قاري محمد امير امیري د دغه ډول روزنيزو سيمنارونو په پيل خوښ وښوده او دا ډول سمينارونه يې د ورزشکارانو لپاره د اسلامي او فکري روزنې په موخه خورا ارزښتناک ياد کړ، ښاغلي اميري همداراز له ټولو گډونوالو څخه وغوښتل، چې په خپل وخت سمينار ته حاضر شي.
د يادونې وړ ده، چې په پلازمېنې کابل کې نږدې ۱۰٫۰۰۰ زره ورزشکارانو او روزونکو ته د ورته سمينارونو لړۍ بشپړه شوې ده.
