کابل؛ د ۵۵ بایسکل ځغلوونکو ترمنځ د بايسکل ځغلونې ملي ټاکنيزې سيالۍ پيل شوې
د المپيک، بدني روزنې او ورزش عمومي رياست اړوند د بايسکل ځغلونې ملي فدراسیون له لوري د هېواد له ۱۴ ولايتونو څخه د ۵۵ بايسکل ځغلوونکو ترمنځ د سرکوي( جاده يي) سبک ملي ټاکنيزې سيالۍ د کابل څخه تر ننګرهاره پورې واټن کې پيل شوې.
په دې سياليو کې ورزشکارانو د لويانو کټګورۍ کې ګډون کړی، چې په پايله کې به يې ۲۵ تنه د بايسکل ځغلونې ملي فدراسيون ملي لوبډلې ته وټاکل شي.
د دې سياليو د پيل په مراسمو کې د هېواد ورزش ادارې د المپیکي چارو رئيس داد محمد پاينده اختري، د دې فدراسيون رئیس سيد نبي الله سادات، ورزشي مسوولينو او ورزشکارانو ګډون کړی وو.
د ويلو ده، چې دغه سیالۍ د بايسکل ځغلونې ملي لوبډلې ته د غوره څېرو موندلو په موخه پيل شوې، چې څلور ورځې به دوام وکړي او په پايله کې به يې ۲۵ تنه د بايسکل ځغلونې د سرکوي سبک ملي لوبډلې ته وټاکل شي.
