په محدودو امکاناتو سترې لاسته راوړنې، افغانستان اسیایي لوبو کې تراوسه څلور مډالونه ګټلي
افغان لوبغاړو د بحرین په کوربتوب د ځوانانو درېیم پړاو اسیایي سیالیو کې څلور مډالونه ګتلي، ورته وخت کې فوټسال له ۱۷ کلونو کم عمره ملي لوبډلې هم په دغو سیالیو کې ښه کارکردګي کړې او لویو هیوادونو ته یې ماتې ورکړي.
د ځوانانو درېیم پړاو اسیايي سیالي د بحرین په پلازمېنه منامه کې د اکتوبر له ۲۲مې پیل شوي، چې په کې د افغانستان په ګډون د ۴۵ هېوادونو څه باندې څلور زره ورزشکاران ګډون لري.
افغان لوبغاړو په دې سیالیو کې تر دې دمه څلور مډالونه ګټلي، چې یو د سپینو زرو او درې د برونزو دي. یحیی محمدي او روحالله نظري د کورش په برخه کې د برونزو مډالونه ترلاسه کړي، دغه راز فیاض ابراهیمي د رزمي ورزشونو په برخه کې د سپینو زرو او احمد قیومي د برونز مډال ترلاسه کړ او افغانستان په دې سیالیو کې تاریخي بریاوې او مډالونه ترلاسه کړل، چې افغان ورزشکارانو پخوا په دې لوبو کې هېڅ مډال نه و ترلاسه کړی.
د افغانستان د فوټسال د ځوانانو لوبډلې هم په دغو لوبو کې په خپل بېساري او زړه راښکونکي پیل سره تر دې مهاله ښې لوبې نندارې ته وړاندې کړي او د ازبکستان، بحرین او چین په شان مهمو هیوادونو ته یې سترې ماتې ورکړي دي.
د ورزشي چارو پوهان وايي، د اسیايي ځوانانو دا لوبې د نړیوالو سیالیو لپاره د استعدادونو د روزنې مهم ډګر دی. د افغانستان لپاره دا مډالونه نه یوازې د سپورتي لاسته راوړنې، بلکې د یو نوي نسل د هیلې او هڅې نښه ده، چې په محدودو امکاناتو سره یې نړیوال ميدان ته ځان رسولی.
د سپورتي چارو د ناظرینو په باور، د افغانستان دا بریاوې کولی شي د هېواد د ځوانانو د سپورتي پالیسۍ، روزنې او ملاتړ په برخه کې مثبت بدلون ته لاره هواره کړي.
د بحرین دا سیالۍ د افغانستان لپاره د یو نوې پیل استازیتوب کوي او د خپلو ځوانو ورزشکارانو په هڅو د نړیوالې سیالۍ په ډګر کې نوې څېره وړاندې کوي.
بلخوا د افغانستان د والیبال ملي لوبډلې هم د مرکزي اسیا والیبال سیالیو کې مالدیف او نیپال هیوادونو ته ماتې ورکړه او له سریلانکا او ترکمنستان څخه یې ماتې وخوړه.
د بحرین هیواد په کوربتوب روانو اسیایي سیالیو کې له افغانستان د اتو ورزشي رشتو ۳۱ ورزشکارانو ګډون کړی، چې تر دې مهاله پکې ښه ځلېدلي.
په دغو سیالیو کې چین د ډېرو مډالونو په ګټلو سره تر ټولو مخکښ دی او افغانستان هم تر ډېرو مهمو اسیایي هیوادونو لکه پاکستان، جاپان، قطر، کویټ او بنګلادیش هیوادونو څخه مخکې دی.
نویو ځوانانو اسیایي لوبې له ۲۰۰۹ میلادي کال راهیسې هر څلور کاله وروسته ترسره کېږي. افغانستان تر دې وړاندې په دغو لوبو کې هېڅ مډال نه و ګټلی او دا دوه مډالونه د راتلونکو بریاوو لپاره د نوو هیلو زېری ورکوي او دا د افغانستان د ورزش په تاریخ کې لویه لاسته راوړنه ده. د افغانستان ورزشکاران لا هم په پهلوانۍ، WTF تکواندو، جوجیتسو، جودو او سوک وهنې په برخه کې د مډال ګټلو چانس لري
