کابل کې د ۲۰۰ ورزشکارانو ترمنځ د لاس چپه کولو سیالۍ پيل شوې
د المپیک، بدني روزنې او ورزش عمومي ریاست په مرسته د ورزش ادارې د ملي، سیمه ییزو او دودیزو لوبو ته د ودې ورکولو امریت له لوري د کابل ولایت د ۲۰۰ ورزشکارانو ترمنځ د لاس چپه کولو لومړی پړاو سیالۍ پيل شوې.
دغه سیالۍ به د لویانو ورزشکارانو په عمري کټګورۍ او په لسو بېلا بېلو وزني کټګوریو کې ترسره شي، چې په پایله کې به ۴۰ غوره ورزشکاران وپېژندل شي.
د دغو سیالیو په پرانیستغونډه کې د ورزش ادارې عمومي رئیس مولوي احمد الله وثیق، د یادې ادارې فني او مسلکي مرستیال حافظ احمد جان ځدارڼ، د المپيکي چارو رئیس داد محمد پاینده اختري، د المپيک ملي کمېټې مرستیال باور خان هوتک، د کابل بدني روزنې او ورزش رئیس مولوي عتیق الله خالد، د ملي، سیمه ییزو او دودیزو لوبو ته د ودې ورکولو امریت مسؤلینو او ورزشکارانو ګډون کړی وو.
په دغو مراسمو کې مولوي احمد الله وثیق د یادو سیالیو د پیلېدو ترڅنګ د بحرین په اسیایي سیالیو کې د افغان ورزشکارانو په ګډون خوښي څرګنده کړه او له ۱۷ کلنو کم عمره د فوټسال ملي لوبډلې وروستۍ بریاوې وستایلې او دغه لاسته راوړنې یې د افغان ورزشکارانو د پرمختګ او هڅو نښه وبلله.
ښاغلي وثیق زیاته کړه د ورزش ادارې رهبري به په خپل ټول توان سره د ورزشکارانو ترڅنګ ولاړ وي او د دوې هر اړخېزه ملاتړ به کوي او د لاس چپه کولو دغه لومړی پړاو سیالۍ د سیمه ییزو او دودیزو لوبو ورزشونو د بیا ژوندي کولو لپاره یوه مهم او ارزښناک اقدام دی.
د یادو سیالیو موخه د ځوانانو ترمنځ سیمه ییزو او دودیزو لوبو ته وده ورکول او په ملي او نړیواله کچه د ورزشکارانو ترمنځ سالمه انګېزه رامنځته کول دي، چې دوې ورځې به دوام وکړي.
