کابل کې د څه باندې ۱۰۰ زره امريکايي ډالرو په لګښت د سنوکر يو معياري کلب پرانيستل شو
دالمپيک، بدني روزنې او ورزش عمومي رياست اړوند د سنوکر ملي فدراسيون سره په همغږۍ د کابل ولايت په شپږمه ناحیه کې د يو ملي پانګوال له لوري د څه باندې ۱۰۰ زره امريکايي ډالرو په لګښت د (( قهرمان اسيا نمبر ۲ )) په نوم د سنوکر يو معياري او په عصري وسايلو سمبال کلب پرانيستل شو.
د دغه کلب د پرانيستې په مراسمو کې د هېواد ورزش ادارې د پلان او ستراتيژۍ سلاکار او د سنوکر ملي فدراسيون فني او مسلکي مرستيال ګلاب الدين خپلواک، د دې فدراسيون رئيس وحيدالله اصغري، ورزشي مسوولينو، ورزشکارانو او ګڼ شمير د سنوکر مينوالو ګډون کړی و.
د ياد کلب د پرانيستې، د سنوکر ورزش د ودې او د ځوانانو د هڅونې په موخه د کابل ولايت له ۸۰ کلبونو څخه د ۱۱۳ ورزشکارانو ترمنځ په درېوو عمري کټکوريو نويو ځوانانو، ځوانانو او ماسټرانو کې د سنوکر تشويقي سيالۍ پيل شوې، چې په لومړۍ لوبه کې يې محمد صادق محمدي ۳ ـ ۰ خپل سيال احمد حسين حيدري ته ماتې ورکړه.
د يادونې وړ ده، چې دغه تشويقي سيالۍ به څلور ورځې دوام وکړي.
