ننگرهار؛ مومندرې ولسوالۍ کې د ۲۴ لوبډلو ترمنځ د ټېپ بال کرېکټ سيالۍ پای ته ورسېدې
د ننگرهار ولايت د بدني روزنې او ورزش رياست په همغږۍ د مومندرې ولسوالۍ اړوند تورخم کې د ۲۴ لوبډلو ترمنځ د ټېپ بال کرېکټ سيالۍ، چې يوه مياشت مخکې پيل شوې وې د گوړکو سوپر سټار لوبډلې په اتلولۍ پای ته ورسېدې.
د دغو سياليو پايلوبه د گوړکو سوپر سټار او ايم ايس زيډ لوبډلو ترمنځ ترسره شوه. د لوبې پچه گوړکو سوپر سټار لوبډلې وگټله او لومړی يې د توپ وهنې پرېکړه وکړه، چې په ټاکلو اتو اورونو کې يې د شپږو لوبغاړو په سوځېدو سره سیالې لوبډلې ته د ۷۹ منډو هدف وټاکه، په مقابل کې ايم ايس زيډ لوبډلې د ټولو لوبغاړو په سوځېدو سره ۵۹ منډې وکړې او لوبه يې د ۲۰ منډو په توپير وبايلله.
د ويلو وړ ده، چې د يادو سياليو موخه د لوبغاړو ترمنځ يووالی رامنځته کول او په پای کې اتلې لوبډلې ته د اتلولۍ جام ورکړل شو.
