بلخ؛ چهار بولک ولسوالۍ کې د ١۶ لوبډلو ترمنځ د ټېپ بال کرېکټ سیالۍ پیل شوې
د بلخ ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولایت په چهار بولک ولسوالۍ کې د ۱۶ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د علم خېلو او حسن خېلو لوبډلو ترمنځ ترسره شوه. د لوبې پچه علم خېلو لوبډلې وګټله او لومړی یې توپوهنه وکړه، چې په ټاکلو اتو اورونو کې یې خپلې سیالې لوبډلې ته د ٩۵ منډو هدف وټاکه. حسن خېلو لوبډلې ټاکلی هدف د پنځو ویکټو په زیان د لوبې پهٔ اووم اور کې ترلاسه کړ او د پنځو ویکټو په توپیر یې د سیالیو لومړۍ بریا خپله کړه.
دا سیالۍ د ځوانانو ترمنځ د یووالي او د کوچني اختر د را رسېدو په موخه پیل شوي دي، چې څلور ورځې به دوام وکړي.
