کابل؛ سوپر سټار لوبډلې د موسهي ولسوالۍ د ټېپبال کريکټ سیاليو اتلولۍ وګټله
د کابل ولایت د بدني روزنې او ورزش ریاست اړوند د تېپبالکريکټ فدراسيون له لوري، د ځوانانو په مالي ملاټر د یاد ولایت په موسهي ولسوالۍ کې د پنځو لوبډلو ترمنځ د ټېپ بال کريکټ رمضاني سیالې د سوپر سټار لوبډلې په اتلولۍ پای ته ورسېدې.
د دغو سیالیو پایلوبه د سوپر سټار او اتفاق لوبډلو ترمنځ ترسره شوه، چې سوپر سټار لوبډلې په ټاکلو ۱۰ اورونو کې د دوو لوبغاړو په سوځېدو ۱۹۵ منډې هدف وټاکه او په مقابل کې سیالې لوبډلې د ټولو لوبغاړو په سوځېدو یوازې ۵۶ منډې وکړي او لوبه یې د ۱۳۹ منډو په توپیر وبایلله.
دغه سیالۍ د یووالي، سالم رقابت او د روژې مبارکې میاشتې ته د هرکلي په موخه تر سره شوې، چې یوه میاشت یې دوام وکړ او په پای کې اتلې لوبډلې ته نغدي جايزه او د اتلولۍ جام ورکړل شو.
