کابل؛ د فوټبال له ۱۷ کلنو کم عمره فوټبال ملي لوبډلې د ۳۰ لوبغاړو دوه مياشتنی تمريناتي کمپ دوام لري
د المپيک، بدني روزنې او ورزش عمومي رياست اړوند د فوټبال ملي فدراسیون له لوري د ياد فدراسیون په فوټبال لوبغالي کې د فوټبال له ۱۷ کلنو کم عمره ملي لوبډلې د ۳۰ لوبغاړو ترمنځ د اسیا ملتونو جام سياليو ته د چمتووالي په موخه دوه مياشتنی تمريناتي کمپ دوام لري.
دغه تمريناتي کمپ د استاد الياس منوچهر تر روزنې او نظارت لاندې پيل شوی، چې له دغه کمپ وروسته به يادو لوبغاړو ته په ازبکستان او کوربه سعودي عربستان هېوادونو کې هم د اسيا ملتونو جام سياليو له پیلېدا مخکې تمريناتي کمپونه جوړ شي.
د يادونې وړ ده، چې د اسيا ملتونو جام سيالۍ به د سعودي عربستان په کوربتوب د روان کال د اپريل په مياشت کې پيل شي، چې په سي ګروپ کې له افغانستان سره اندونيزيا، يمن او جنوبي کوريا هېوادونه ګډون لري.
د ياد تمريناتي کمپ موخه د اسيا ملتونو جام سياليو ته د لوبغاړو لا ښه چمتووالی دی، چې د روان کال د اپريل تر درېيمې نېټې پورې به دوام وکړي.
