د بدني روزنې او ورزش عمومي ریاست رهبري د سرپل ولایت له ورزشي امريت څخه لیدنه وکړه
د المپیک، بدني روزنې او ورزش عمومي ریاست رييس مولوي احمدالله وثیق او ورسره مل پلاوي، سرپل ولایت ته د سفر په ترڅ کې د یاد ولایت له ورزشي امريت او اداري کارکوونکو سره وکتل.
په دغه لیدنه کې د المپیک، بدني روزنې او ورزش عمومي ريیس مولوي احمدالله وثیق، د ياد رياست فني او مسلکي مرستیال حافظ احمد جان ځدراڼ، ورزشي سلاکار قاري حیات الله رحماني او ورسره مل پلاوي، د سرپل ولایت ورزشي امر عبدالحق فیضي، د بېلابېلو فدراسیونونو استازو او نورو اداري کارکوونکو ګډون کړی و.
په پیل کې د سرپل ولایت ورزشي امر عبدالحق فیضي د ورزش ادارې رهبري ته د ښه راغلاست ترڅنګ خوښي څرګنده کړه، چې د هېواد یوه لرې ولایت ته یې د ورزش د ودې په موخه سفر کړی دی.
ښاغلي فیضي د سرپل ولایت د ورزش د وروستي وضعیت پر اړه خبرې وکړې او وې ويل، چې په دې وروستیو کې د دغه ولایت ورزشکارانو په بېلابېلو ورزشي برخو کې د پام وړ پرمختګ کړی دی.
ښاغلي فیضي همداراز زیاته کړه چې غواړي په یاد ولایت کې د یو شمېر نورو ورزشي رشتو استازولۍ هم فعالې کړي او هغه فدراسیونونو چې په یاد ولایت کې نیمه فعال دي؛ په بشپړ ډول فعال کړي.
د دغه لیدنې په ترڅ کې د سرپل ولایت د فدراسیونونو استازو هم یاد ولایت ته د هېواد د ورزش ادارې د رهبري په سفر خوښي وښوده او هیله یې څرګنده کړه چې د دغه ولایت د ورزشي ودې لپاره ځانګړې پاملرنه وکړي او وې غوښتل چې په دغه ولایت کې یو شمېر ورزشي اماکن جوړ کړي.
ښاغلي وثیق په خپلو خبرو کې د سرپل د ورزشکارانو او د دوی د وروستیو ورزشي فعالیتونو ستاینه وکړه او همداراز یې زیاته کړه، چې د دغه ولایت ورزشي امریت باید د ورزشي ودې او د ځوانانو د سالمې روزنې په برخه کې خپل ور سپارل شوی مسوولیت په سمه توګه ادا کړي.
ښاغلي وثیق همداراز ژمنه وکړه، چې په راتلونکي کال کې به د ياد ولايت رغنیزو، تشکیلاتي او ورته نورو برخو ته ځانګړی پام وکړي.
